GREEN SM ຮ່ວມມືກັບ 10 ພັນທະມິດຍຸດທະສາດ ຂະຫຍາຍລະບົບນິເວດການເດີນທາງສີຂຽວໃນ ສປປ ລາວ

ນະຄອນຫຼວງວຽງຈັນ, ວັນທີ 9 ພະຈິກ 2026 – Green SM ປະກາດການລົງນາມໃນບົດບັນທຶກຄວາມເຂົ້າໃຈ (MOU) ກັບ 10 ພັນທະມິດດ້ານຍຸດທະສາດໃນ ສປປ ລາວ ໃນຂະແໜງການການເງິນ–ທະນາຄານ, ໂທລະຄົມມະນາຄົມ, ການຊຳລະເງິນ, ການທ່ອງທ່ຽວ ແລະ ທີ່ພັກ. ຂໍ້ຕົກລົງດັ່ງກ່າວມີເປົ້າໝາຍເພື່ອເຊື່ອມໂຍງແພລດຟອມ, ບູລະນາການບໍລິການ ແລະ ພັດທະນາສິ່ງອຳນວຍຄວາມສະດວກສຳລັບລູກຄ້າ, ຊຶ່ງຈະຊ່ວຍຂະຫຍາຍລະບົບນິເວດການເດີນທາງສີຂຽວ ແລະ ຍົກລະດັບປະສົບການໃນການໃຊ້ບໍລິການ Green SM ໃນຕະຫຼາດລາວ.

ພາຍໃຕ້ຫົວຂໍ້ “Green Alliance Frontier” – “ຈຸດບັນຈົບພົບກັນຂອງຜູ້ນຳໜ້າໃນເສດຖະກິດສີຂຽວ” ພິທີລົງນາມໄດ້ຈັດຂຶ້ນເນື່ອງໃນໂອກາດຄົບຮອບ 3 ປີ ທີ່ Green SM ເປີດໃຫ້ບໍລິການລົດແທັກຊີໄຟຟ້າຢ່າງເປັນທາງການໃນ “ດິນແດນລ້ານຊ້າງ” ໂດຍໄດ້ຮັບກຽດຈາກ ທ່ານ ຫງວຽນ ມິງ ເຕິມ (Ông Nguyễn Minh Tâm) – ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດສັງຄົມນິຍົມຫວຽດນາມ ປະຈຳ ສປປ ລາວ ເຂົ້າຮ່ວມ.

ພາຍໃນງານ, ມີ 10 ພັນທະມິດທີ່ໄດ້ລົງນາມ MOU ກັບ Green SM ປະກອບມີ VietinBank Laos, Joint Development Bank Public, MB Bank Laos ແລະ Sacombank Laos ໃນຂະແໜງການການເງິນ–ທະນາຄານ; Unitel, ETL ແລະ Lao Telecoms (M-Money) ໃນຂະແໜງການໂທລະຄົມມະນາຄົມ ແລະ ການຊຳລະເງິນ; Good Media (Bawanli) ໃນຂະແໜງການຂົນສົ່ງ ແລະ ການທ່ອງທ່ຽວ; ພ້ອມດ້ວຍ Muong Thanh Luxury Vientiane Hotel ແລະ Latsavong Wanda Vista Hotel ໃນຂະແໜງການທີ່ພັກ.

ຕາມຂໍ້ຕົກລົງ, Green SM ແລະ ບັນດາພັນທະມິດຈະນຳໃຊ້ຈຸດແຂງດ້ານເຕັກໂນໂລຊີ, ການບໍລິການ ແລະ ເຄືອຂ່າຍລູກຄ້າ ເພື່ອສຶກສາຄວາມເປັນໄປໄດ້ໃນການບູລະນາການບໍລິການເດີນທາງດ້ວຍລົດໄຟຟ້າເຂົ້າກັບລະບົບຜະລິດຕະພັນ ແລະ ບໍລິການທີ່ມີຢູ່, ພ້ອມທັງພັດທະນາໂຄງການສິດທິພິເສດ ແລະ ການດູແລລູກຄ້າ. ສິ່ງນີ້ຈະຊ່ວຍໃຫ້ຜູ້ໃຊ້ບໍລິການມີທາງເລືອກຫຼາຍຂຶ້ນໃນການເຂົ້າເຖິງ, ຊຳລະເງິນ ແລະ ໃຊ້ບໍລິການ Green SM ໄດ້ຢ່າງສະດວກຜ່ານແພລດຟອມທີ່ຄຸ້ນເຄີຍ.

ໃນຂະແໜງການທ່ອງທ່ຽວ ແລະ ທີ່ພັກ, ບັນດາຝ່າຍຈະຮ່ວມກັນສຶກສາການເຊື່ອມໂຍງບໍລິການ Green SM ເຂົ້າກັບລະບົບໂຮງແຮມ ແລະ ຈຸດໃຫ້ບໍລິການຕ່າງໆ ເພື່ອສະໜອງທາງເລືອກການເດີນທາງທີ່ສະດວກສະບາຍໃຫ້ແກ່ແຂກທີ່ເຂົ້າພັກ, ນັກທ່ອງທ່ຽວ ແລະ ລູກຄ້າອົງກອນ. ນອກຈາກນັ້ນ, ການຮ່ວມມືກັບພັນທະມິດດ້ານສື່ມວນຊົນ ຍັງຈະເປີດໂອກາດໃຫ້ມີການຈັດກິດຈະກຳຮ່ວມກັນພາຍໃຕ້ແບຣນ, ປະຊາສຳພັນບໍລິການ ແລະ ເຜີຍແຜ່ປະໂຫຍດຂອງຍານພາຫະນະໄຟຟ້າສູ່ຊຸມຊົນ.

ອີກໜຶ່ງຈຸດເດັ່ນຂອງງານແມ່ນຜົນງານ “Frontier Mark” ເຊິ່ງເປັນການນຳເອົາສັນຍະລັກຂອງພັນທະມິດແຕ່ລະລາຍມາເຊື່ອມປະສານເປັນສັນຍະລັກຮ່ວມອັນດຽວ ເພື່ອສະທ້ອນເຖິງຈິດໃຈແຫ່ງການຮ່ວມມື ແລະ ວິໄສທັດໃນການພັດທະນາລະບົບນິເວດສີຂຽວຂອງທຸກຝ່າຍໃນ ສປປ ລາວ.

ທ່ານນາງ ເລ ທິ ຫງອກ ລິງ (Bà Lê Thị Ngọc Linh)– ຮອງຜູ້ອຳນວຍການໃຫຍ່ຝ່າຍປະຕິບັດການ Green SM ໃຫ້ຄຳເຫັນວ່າ: “ການຫັນປ່ຽນສູ່ສີຂຽວແມ່ນການເດີນທາງທີ່ຕ້ອງອາໄສການຮ່ວມແຮງຮ່ວມໃຈ ແລະ ການມີສ່ວນຮ່ວມຈາກຫຼາຍບໍລິສັດ ແລະ ອົງກອນໃນຫຼາຍຂະແໜງການ. ຜ່ານ Green Alliance Frontier, ພວກເຮົາມຸ່ງຫວັງທີ່ຈະສ້າງພື້ນທີ່ແຫ່ງການເຊື່ອມໂຍງ ເພື່ອໃຫ້ Green SM ແລະ ບັນດາພັນທະມິດໄດ້ຮ່ວມກັນແບ່ງປັນວິໄສທັດ, ນຳໃຊ້ຈຸດແຂງຂອງຕົນ ແລະ ຊອກຫາໂອກາດການຮ່ວມມືທີ່ເປັນຮູບປະທຳ. ຜ່ານການເຊື່ອມໂຍງແພລດຟອມ, ການບໍລິການ ແລະ ເຄືອຂ່າຍລູກຄ້າ, ພວກເຮົາຄາດຫວັງວ່າຈະສາມາດນຳເອົາທາງອອກດ້ານການເດີນທາງສີຂຽວເຂົ້າໃກ້ຊິດກັບປະຊາຊົນຫຼາຍຂຶ້ນ ພ້ອມທັງປະກອບສ່ວນສ້າງຄຸນຄ່າທີ່ຍືນຍົງໃຫ້ແກ່ຊຸມຊົນ ແລະ ປະເທດລາວ.”

ພາຍຫຼັງການດຳເນີນງານໃນ ສປປ ລາວ ເປັນເວລາ 3 ປີ, Green SM ໄດ້ໃຫ້ບໍລິການເດີນທາງແລ້ວເກືອບ 4.6 ລ້ານຖ້ຽວ. ການຮ່ວມມືກັບ 10 ພັນທະມິດດ້ານຍຸດທະສາດໃນຄັ້ງນີ້ ຈະຊ່ວຍຂະຫຍາຍເຄືອຂ່າຍການເຊື່ອມໂຍງຂອງ Green SM ໃຫ້ກວ້າງຂວາງຍິ່ງຂຶ້ນ, ໂດຍມຸ່ງເນັ້ນການບູລະນາການບໍລິການເດີນທາງສີຂຽວເຂົ້າກັບສິ່ງອຳນວຍຄວາມສະດວກທີ່ຈຳເປັນ ເພື່ອຕອບສະໜອງຄວາມຕ້ອງການໃນການເດີນທາງຂອງປະຊາຊົນ ແລະ ນັກທ່ອງທ່ຽວໃຫ້ດີຍິ່ງຂຶ້ນ.

ຜ່ານການຮ່ວມມືຫຼາຍຂະແໜງການ, Green SM ແລະ ບັນດາພັນທະມິດຄາດຫວັງວ່າຈະຮ່ວມກັນຂະຫຍາຍໂອກາດໃນການເຂົ້າເຖິງທາງອອກດ້ານການເດີນທາງດ້ວຍລົດໄຟຟ້າ, ເພີ່ມສິ່ງອຳນວຍຄວາມສະດວກໃຫ້ແກ່ລູກຄ້າ ແລະ ປະກອບສ່ວນຜັກດັນແນວໂນ້ມການຄົມມະນາຄົມທີ່ຍືນຍົງໃນ ສປປ ລາວ./.